Ra'iisul wasaaraha iyo madaxda maamulada oo la shiray guddiga gurmadka abaaraha

Ra’iisul wasaaraha xukuumadda federaalka ah ee Soomaaliya, Xasan Cali Kheyrre iyo madaxda maamul
Gobolleedyada dalka ayaa si wada jir ah kulan gaar ah la qaatay guddiga gurmadka abaaraha oo ay ka dhageysteen waxyaabihii u qabsoomay.

Madaxda kulankaan ka qeybgalay ayaa waxaa ka mid ahaa madaxweynaha Jubbaland, Koonfur Galbeed, Hirshabeelle, Puntland iyo guddoomiyaha cusub ee gobolka banaadir.

Sheekh Nuur Baaruud oo ku hadlayay magaca Guddiga gurmadka abaaraha ayaa tilmaamay in muddadii saddexda bilood ee guddiga shaqeynayay lacagihii ay qabteen badan keeda ay gaarsiiyeen dadka dhibaataysay, wuxuna si gaar ah mahad uga celiyey cid walba oo gacan ka geystay gurmadka.

(adsbygoogle = window.adsbygoogle || []).push({});

Qaar ka mid ah Madaxda maamul gobolleedyada ayaa ku ammaanay Guddiga gacanta ku haya gurmadka Abaaraha sida ay u dhawrayaan ammaanada loo dhiibay, waxayna sheegeen in loo baahan yahay guud ahaan dadka Soomaaliyeed ay isku tashadaan si looga maarmo kaalmo shisheeye.

Ra’iisul wasaaraha xukuumadda federaalka ah ee Soomaaliya Xasan Cali Kheyrre ayaa sheegay in dadka Soomaaliyeed ay muujiyeen isku tashi, isagoo tilmaamay in gurmadkani uu ka tarjumayo soo noqoshada kalsoonidii ay isku qabeen bulshada Soomaaliyeed.

“Si looga tabaabusheysto inay soo laabtaan abaaraha, xukuumadu waxay abuuri doontaa mashruucyo lagu horumarinayo beeraha iyo wax soo saarka, sidoo kalena waxay sameyn doontaa biyo xireenno, si looga faa’iideysto xilliga jiilaalka” ayuu yiri Ra’iisul Wasaare Kheyrre oo ka hadlayay markii uu soo dhamaaday kulanka.