Ra’iisal Wasaare Xasan Cali oo Markii ugu horreysay ka hadlay arrinta wadahadallada Somaliland

Ra’iisal Wasaaraha Soomaaliya Xasan Cali Khayre ayaa markii u horeysay sheegay inay Xukuumadiisu sii wadi doonto wada hadaladii u
socday Soomaaliya iyo Somaliland.

Ra’iisal Wasaare Khayre ayaa tilmaamay in dadka Somaliyeed oo idil ay u baahan yihiin dib u heshiisiin la isugu keenayo, bacdamaa ay dhibaatooyin badan kala tirsanayan.

Wuxuuna ayaa sheegay in Somaliland ay qayb ka tahay sharafta iyo karaamada umadda Soomaaliyeed, isagoona xilligii burburka ku ammaanay in wax badan u qabatay bulshada Somaliyeed.

Wuxuu ku nuux-nuuxsaday in horey loo amba qaado wada hadalada iyo nabadaynta dalka ay tahay mid qayb ka ah tiirarka Xukuumadiisa, horena uu ka sheegay Baarlamaanka hortiisa.

Ra’iisal Wasaaruhu ayaa sidoo kale waxa uu sheegay in tani ay qayb ka tahay qorshaha uu Madaxweyne Maxamed C/laahi Farmaajo uu ku hogaaminayo dalka.

Bisha soo socota ee May ayuu sheegay in xukuumadiisu ay shirka London la hortaggi doonto codsi ku aadan in Soomaaliya laga qaado xayiraadda hubka ee saaran, si loo dardargeliyo amniga guud ee dalka.